Historique des Tréteaux de l'Impasse
Par Jean Marc DELATTRE
Cha comminche in 1989, un camarate à nous z' autes , i a fait faire du théâte à ses éléfes pour commémorer ch' bicentenaire. Du cop i a eu eine subvention pis i a acaté un tiot peu d' matériel.
Alors comme ch' arot été dommache d' brader , Pascal BECU , ( ch' est sin nom à nou camarate instituteur ) , il a eu l'idée d' créer eine troupe. A l'époque cha s' passot à BURBURE, in répétot à l' salle des fêtes dins eune impasse. Voilà cha ch' est pour les ceusses qui s' demindrottent d' du qu' i vient l' nom de l' troupe.
Ch'est comme cha que cha a comminché :
I avot Pascal BECU , Mélanie FLAMENT ( eune des éléfes), s' mère Anne APPOURCHAUX , s' matante Sonia LEMAIRE pis aussi Martine GRAUX et eune paire d' autes. L' idée ch' étot d' monter l' première pièche in patois d' Bertrand COCQ , « In n' dit pas d' mau d' ches morts ! » …..mais comme cha n' avinchot pas assez vite à lu motte Pascal il a demindé à sin camarate Jean-Marc DELATTRE , ( de la troupe des Artisans de Bruay) , d' les arjointe pour lu donner un cop d' mains. Jean-Marc i a réussi à dénorter sin mononque Gérard CANIVEZ et un aute « artisan » Sébastien Ossowski .
Voilà l' gros d' la troupe i étot in plache et quand j' dis cha j' pale pas d' Bertrand qui n' faisot pas vraimint partie du pestaque sauf qu' i v' not quéquefos juer un tout pitit rôle (si …si , ch'est possipe !)
In a jué eine dijaine d' fos l' pièche, (1990-1991) ch' étot fin bien et l' aventure comminchot.
Après , ( in 1992) , in a jué eune biographie, « Vivre Brel ! » cha s'appelot. Ch' étot Pascal qui l' avot écrit et Jean-Marc qui l' avot mis en scène. Ch' étot bien aussi , les peu d' gins qui sont allés l' vire n' l' ont pas argretté, seulement ch' est moins porteur que l' patois alors in a demindé à Bertrand si y pourrot pas s' armette à l' ouvrache. I a dis ouais, ch' est pas un fate.
Il a écrit « Eine partie d' pêque à l'ieau » avec dins l' idée d' incarner Léon Grossel.
Clarmente, Léon, Hortense, Gérard, Marguerite, François, Anne-Marie étotent vénus au monte …depus ch' temps là… cha suit sin cours !
